ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ຮ່ວມມືກັບ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ-ປາຊີຟິກ (APCICT/ ESCAP) ໄດ້ເປີດຊຸດຝຶກອົບຮົມ ການບໍລິຫານໂຄງການແບບດິຈິຕອນ ແລະ ການຫັນເປັນຜູ້ນໍາ (Digital Project Management and Transformational Leadership Training) ໃນວັນທີ 11 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ ໂດຍໃຫ້ກຽດເປັນປະທານກ່າວເປີດຂອງທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ມີທ່ານ ໂຄ ຄີຢອງ ຜູ້ອໍານວຍການ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ-ປາຊີຟິກ ພ້ອມດ້ວຍທີມງານ ແລະ ຄູຝຶກ, ບັນດາຄະນະກົມທຽບເທົ່າ ພາຍໃນກະຊວງ ເຕັກໂນໂລຊີ ແລະ ການສື່ສານ ພ້ອມທັງຜູ້ເຂົ້າຮ່ວມຝຶກອົບຮົມຈາກຂະແໜງເຕັກໂນໂລຊີ ແລະ ການສື່ສານ ແລະ ຂະແໜງການອື່ນອ້ອມຂ້າງກະຊວງ ເຂົ້າຮ່ວມ 50 ກວ່າຄົນ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ແມ່ນ ເພື່ອສົ່ງເສີມ ແລະ ພັດທະນາທັກສະຂອງການບໍລິຫານໂຄງການແບບດິຈິຕອນ ໃຫ້ພະນັກງານໃນທຸກຂົງເຂດວຽກງານ ມີຄວາມຮູ້ ແລະ ຄວາມເຂົ້າໃຈຕໍ່ກັບການບໍລິຫານໂຄງການແບບດິຈິຕອນ ພ້ອມທັງສົ່ງເສີມໃຫ້ພະນັກງານມີພາວະການເປັນຜູ້ນຳທີ່ເຂັ້ມແຂງ ໃນຍຸກຂອງການຫັນເປັນດິຈິຕອນ; ການຝຶກອົບຮົມໃນຄັ້ງນີ້ ຍັງເປັນການສືບຕໍ່ເພີ່ມທະວີການພົວພັນຮ່ວມມືກັບອົງການຈັດຕັ້ງສາກົນ ກໍຄື ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ-ປາຊີຟິກ ໃນການສົ່ງເສີມຫັນເປັນດິຈິຕອນຂອງ ສປປ ລາວ ອີກດ້ວຍ.

ຊຸດຝຶກອົບຮົມດັ່ງກ່າວ, ແມ່ນໄດ້ດຳເນີນໄປເປັນເວລາ 2 ວັນ ເລີ່ມແຕ່ວັນທີ 11-12 ມັງກອນ 2024 ຊຶ່ງຜູ້ເຂົ້າຮ່ວມຈະໄດ້ຮັບຟັງການນໍາສະເໜີຫຼາຍຫົວຂໍ້ທີ່ສໍາຄັນ ເຊັ່ນ: ການບໍລິຫານໂຄງການແບບດິຈິຕອນ (ພາບລວມຂອງການບໍລິຫານໂຄງການ), ກິດຈະກຳການບໍລິຫານໂຄງການ, ການບໍລິຫານງົບປະມານ ແລະ ການລົງທຶນຂອງໂຄງການ, ສາເຫດ ແລະ ຄວາມລົ້ມເຫຼວຂອງໂຄງການ, ການບໍລິຫານຄວາມສ່ຽງ ແລະ ມາດຕະການຫຼຸດຄວາມສ່ຽງ, ການບໍລິຫານໂຄງການຂອງລັດ ແລະ ການຫັນເປັນຜູ້ນໍາໃນວຽກງານດິຈິຕອນ. ພ້ອມກັນນັ້ນ, ຜູ້ເຂົ້າຮ່ວມຍັງຈະໄດ້ແລກປ່ຽນສົນທະນາຄໍາຄິດເຫັນລະຫວ່າງນັກຝຶກອົບຮົມດ້ວຍກັນ ແລະ ຜູ້ສິດສອນຈາກຕ່າງປະເທດ ເສີມສ້າງຄວາມອາດສາມາດໃນການເຮັດວຽກ ແລະ ປະກອບສ່ວນໃນທີມງານຄຸ້ມຄອງໂຄງການດິຈິຕອນ ຕື່ມອີກ.

ຂໍ້ມູນເພີ່ມຕື່ມ

ເວັບໄຊທ໌: https://www.digitalweek.gov.la
ເພຈເຟສບຸກ: https://www.facebook.com/Laodigitalweek
ຢູທູບ: https://www.youtube.com/@laodigitalweek
ຕິກຕອກ: https://tiktok.com/@laodigitalweek
ອີເມລ: laodigitalweek@mtc.gov.la
ໂທລະສັບ: 020 9964 5656 / 020 2205 5955

© 2024 ສັບປະດາດິຈິຕອນລາວ. ສະຫງວນລິຂະສິດ.